Ming kleine Biographie  Deil I 

Am 05.09.1954 han ich et Leech vun der Welt erbleck. Dat wor en Porz - Wahn, dat dät domols noch zom Rheinisch-Bergische Kreis gehüre. Jetz wor ävver dä blöde Kreeg noch nit esu lang her, un in Wahn hät et mir üvverhaup nit gefalle, und dann han Papp un Mamm mir dä Gefalle gedonn, un sin met mir in uns aal Huus em Rathenau Veedel (Quartier Latin) ömgetrocke. God, do soh et och nit esu berauschend us, vill Trümmer un aal Fassade, ävver su noh un noh han de Lückche dat Veedel widder opgebaut.

Om Rathenau Platz, dä heeß domols noch Königsplatz, jedenfalls han se in esu genannt, un en der koote Form, einfach nor "Plätzche". En minger Stroß gov et an jeder Eck en Weetschaff, meddendren ene Lade, wo mer Milch, Kis un Botter holle kunnt, öm de Eck ene Metzger, ne Lade met Ieserware und noch e paar Weetschafte, e Kaffee Geschäff un ene Kindergaade. Dat wor domols ming kleine Welt, do ben ich en der Kindergaade gegange, un wie ich ald genog wor, en de Grundschull, die och öm de Eck wor, katholisch natörlich, un streng noh Mädche un Junge getrennt. Die vier Johr op der Schull wore schnell vörbei, und dann ging et op et Gymnasium noh Sölz, op et Schiller Gymnasium.