Ming kleine Biographie Deil II 

 

Do woodt et dann schon schwieriger, ich moot Sproche liere und dat ganze andere Züg, wat mer em Levve bruche kann, oder och nit. Öm die Zigg han ich och minge eeschte Gitta-Ungerrich kräge. Ich weed et nie vergesse, en schwatz -rud lackeete Framus wor ming eetste Gitta, et eetste Leed, wat ich spille kunnt, wor "Seemann lass das träumen". Weil ich ävver met däm Dress nit vill aanfange kunnt, han ich dä Ungerrich widder geschmesse. De Finger han mir och immer wih gedonn.

En der Kirch wor ich och immer engagiert, ich wor Messdeener, dät morgens um 0600 Uhr immer de Fröhmess deene, un och söns dät ich vill. Ich wor bei de Pfadfinder, han och jeden Dag en gode Tat begange, ich wor zofredde. Mer hatte jo domols nit vill, han ävver immer Spass gehat.   Em Jugendheim, wo mer uns regelmäßig getroffe han, han ich dann e paar Junge kennegeliert, un met dänne han mir beschlosse mer maache en Band op. Däm Uli singe Vatter wor Huusmeister em Jugenheim, dä hät uns op der Speicher gelooße, un do stund us fröhere Zigge, en decke Trumm un e Snare Drum un e paar aal Becke, und dat Schlagzeug durfte mir han. Dann sin mer met däm ganze Krom en der Keller getrocke, en der "Beat Keller". Jeder hät jet en de Hand genomme, wo hä Musik met maache kunnt, und et etzte Leed wat mer gespillt han wor: If there´s anything that you want... von de Beatles, gläuve ich, wor et. Et hät sich fürchterlich aangehürt, su kunnt dat nit klappe met der Karriere. Also han mir aangefange zo arbeide, em Supermaat, om Bau, em Hotel, en der Hotelköch, also üvverall do, wo et jet zo verdeene gov. Op die Tour kome e paar Nüsele zosamme, dann han mer noch de Eldere und de Verwandtschaff aangepump, un schon baal, kunnte mir uns schöne Saache kaufe, wann och nur gebruch. De Musik woodt immer besser (un lauter), un baal hatte mir unser eschte Optritt.